joomla
free templates joomla

Маросими супоридани дипломҳо

 

 

 

                                          

    14-уми сентябри соли 2015 дар маҷлисгоҳи Академияи илмҳои Ҷумҳурии   Тоҷикистон маросими супоридани дипломҳо ба номзадҳои илм, ки рисолаҳояшон аз ҷониби Комиссияи олии атестатсионии Федератсияи Россия  тасдиқ шудааст,  баргузор гардид.

    Президенти    Академияи илмҳои Ҷумҳурии Тоҷикистон, академик Фарҳод Раҳимӣ дипломҳоро ба номзадҳои  илмҳои сиёсӣ Амид Комилбеков, Саймуддин Мирзоев, Носирҷон Бўриев, Умедҷон Исоев, ба номзади илмҳои  фалсафа Мирзо Абдуллоев, ба  номзади илмҳои педагогӣ Парвиз Лоиқов, Абдулҳомид Гулмирзоев ва  номзади илмҳои ҳуқуқ Зайнура Исмоилова супорида,  ба онҳо дар соҳаи пешбурди илм дар оянда барору комёбиҳо таманно намуд.

 

 

 

Изҳороти кормандони Академияи илмҳои Ҷумҳурии Тоҷикистон дар робита бо ҳодисаҳои ахири кишвар

 

 

 

 

       Кормандони Академияи илмҳои Ҷумҳурии Тоҷикистон, бинобар ҳодисаҳое, ки тайи чанд рӯзи охир дар кишвар рух доданд, изҳори таассуф карда, тамоми амалҳои ҷинояткоронаи гурӯҳҳои тахрибкори ҷомеаро комилан маҳкум менамоянд.

Имрӯз ҳар як тоҷику тоҷикистонӣ аз дастовардҳои кишвари соҳибистиқлоли худ меболад ва ифтихор аз он дорад, ки маҳз тавассути сиёсати хирадмандона ва дурандешонаи Сарвари давлат ва Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон вазъи иқтисодию иҷтимоии кишвар рушд мекунад ва мардуми шарифи Тоҷикистон дар фазои сулҳу субот, якдигарфаҳмӣ ва тинҷию амонӣ зиндагӣ доранд.

Мутаассифона, неруҳое ҳастанд, ки муваффақияту дастовардҳои кишварамонро нодида гирифта, даст ба амалҳои нангин ва хиёнати рӯйирост ба Ватан мезананд. Хилофи сиёсати созандагӣ ва бунёдкоронаи Президенти кишвар Эмомалӣ Раҳмон амал кардани як гурӯҳ гумроҳшудагон ва ҷинояткорон, ки ҳамчун душмани истиқлолият ва ҳувияти миллӣ амал мекунанд, василаи бозиҳои геополитикӣ қарор мегиранд. Бар мабнои ин бозиҳои сиёсӣ, дар аксари расонаҳои хабарӣ ва гурӯҳии мустақили дохилӣ ва хориҷӣ ахбори дурӯғин ва таҳлилу гузоришоти муғризона интишор шуда, сиёсати давлати миллӣ мавриди ҳуҷумҳои иттилоотӣ қарор мегирад. Вале ин маънои онро надорад, ки Ватан, Миллат ва Халқи Тоҷикистон ба ин гуна ҳазёну даъватҳои хоинони ватанӣ бовар мекунанд, баръакс, мардуми тамоми манотиқи ҷумҳурӣ, ки ҷонибдори сулҳу осоиштагӣ ҳастанд, таҳти ливои сиёсати башардӯстонаи давлат ва Ҳукумат сарҷамъ шуда, ба чунин хиёнаткорон нафрати хешро баён мекунанд.

Ҳадафи аслии бозиҳои сиёсии минтақавӣ бо ҳар роҳу василаи дастрас халалдор ва муташанниҷ сохтани вазъ дар минтақа буда, коргардонони бозиҳои геосиёсӣ ҷиҳати ноил шудан ба мақсад ҳамеша аз нерӯ ва  шахсони калаванда, риёкор, саҳлангор ва фурсатталаби дохилӣ истифода мекунанд. Ин аст, ки дар бозии навбатӣ дафъатан аз шахсиятҳои хиёнаткор чун генерал-майор Назарзода Абдуҳалим Мирзо  сӯистифода шуд ва хушбахтона, нақша ва амалиёти низомии моҷароҷӯёна бесамар анҷом ёфт.

Яқин аст, ки Халқ ва Ватан ҳаргиз ба чунин шахсони  хиёнаткор ва моҷароҷӯ бовар намекунад, ин гуна симоҳои ватанбезор ва миллатситезро ба саҳнаи зиндагии миллӣ ва ватанӣ роҳ намедиҳад ва дар ҳолатҳои зарурӣ аз номусу ҳувияти худ дастаҷамъона дифоъ мекунанд.

Тамоми олимон ва кормандони Академияи илмҳои Ҷумҳурии Тоҷикистон низои мусаллаҳонаи ин гурӯҳи гумроҳшударо маҳкум намуда, иброз медоранд, ки ҳамеша ҷонибдори сулҳу оромӣ ва сиёсати дурбинона ва хирадмандонаи Сарвари давлат муҳтарам Эмомалӣ Раҳмон буданд ва хоҳанд буд.

Мо боварии комил дорем, ки гурӯҳҳои террористӣ ва ҷинояткор қодир нестанд, ки пояҳои Истиқлолияти давлатӣ ва раванди амният ва сулҳу Ваҳдати миллиро халалдор намоянд, зеро тамоми мардуми Тоҷикистон сиёсати сулҳҷӯёнаи давлатро дастгирӣ менамоянд ва ба ҳар гуна зуҳуроту амалҳои зиддидавлатӣ ва зиддимилӣ бо муттаҳидию вафодорӣ ва аҳдофи олии Ватан ва миллат мубориза мебаранд. Олимон ва кормандони Академияи илмҳои Ҷумҳурии Тоҷикистон дар ин ҷараён бо халқ ва Сарвари давлатамон муҳтарам Эмомалӣ Раҳмон якҷо ва ҳаммаром мебошанд ва аз тамоми аҳолии ҷумҳуриамон даъват менамоем, ки зиракии сиёсиро аз даст надода, муттаҳидӣ ва ягонагии ҷомеаи моро боз ҳам қавитар гардонанд ва барои хушбахтӣ ва саодати имрӯзу фардои фарзандони худ бо азми қавӣ кору пайкор  намоянд. 

                                       

Дар  маҷлиси умумии Академияи илмҳои  Ҷумҳурии Тоҷикистон 7 сентябри соли 2015 якдилона қабул шудааст.

 

 

 

Академияи илмҳо соҳибдипломи Намоишгоҳи «Китоби Душанбе»

 

    Бо ибтикори Вазорати фарҳанги Ҷумҳурии Тоҷикистон рӯзҳои 4 ва 6-уми сентябри соли ҷорӣ дар бинои  Театри давлатии опера ва балети Тоҷикистон ба номи  Садриддин Айнӣ Намоишгоҳи 5-уми байналмилалии   «Китоби Душанбе»  доир гардид.

Дар Намоишгоҳ  ноширони ватанӣ ва хориҷӣ беҳтарин китобҳои илмиву оммавӣ,  бадеӣ,таълимӣ ва адабиёти бачагонаро барои намоишу фурӯш пешкаш намуданд.

Академияи илмҳои Ҷумҳурии Тоҷикистон ва Китобхонаи илмии АИ ҶТ ба номи  Индира Гандӣ дар  Намоишгоҳи  мазкур низ фаъолона ширкат варзида, дар ҷамъбасти он бо  Дипломи Вазорати фарҳанги Ҷумҳурии Тоҷикистон сарфароз  гардиданд.

Вохӯрии машваратӣ

 

 

     Дар Академияи илмҳои  Ҷумҳурии Тоҷикистон вохӯрии машваратӣ дар мавзӯи  «Баррасии  масоили тартиби атестатсияи  олимон ва кадрҳои илмӣ-педагогии  боихтисос  дар     Ҷумҳурии  Тоҷикистон» бо иштироки намояндагони Комиссияи олии  атестатсионии  Вазорати маориф ва илми Федератсияи Русия баргузор гардид. 

Дар  вохӯрии машваратӣ  «Оид ба Шӯрои ҳимояи рисолаҳо барои дарёфти дараҷаи илмии  номзади илм ва доктори илм дар Ҷумҳурии Тоҷикистон» директори Департаменти атестатсияи  олимон ва ходимони илмӣ-педагогии Вазорати маориф ва илми Федератсияи Русия Шишканова Инесса Алексеевна ва муовини директори Департаменти мазкур Пахомов Сергей Иванович бо маърӯзаҳо баромад намуданд .

         Дар анҷом меҳмонон аз Донишгоҳи миллии Тоҷикистон, Институти таърих, бостоншиносӣ ва мардумшиносии Академияи илмҳои Ҷумҳурии Тоҷикистону Осорхонаи миллии бостоншиносию мардумшиносии он ва Пойгоҳи кӯҳии набототшиносии Институти  ботаника,физиология ва генетикаи растании АИ ҶТ воқеъ дар мавзеи «Кондара» дидан намуданд.

Вохӯрӣ хеле муфид ва босамар баргузор гардид.

 

Маҷлиси тантанавӣ бахшида ба 24-умин солгарди Истиқлолияти давлатӣ

     7- уми сентябри соли 2015 дар маҷлисгоҳи Академияи илмҳои Ҷумҳурии Тоҷикистон бо иштироки аъзои Академияи илмҳо, олимон ва  кормандони  муассисаҳои илмӣ маҷлиси тантанавӣ бахшида ба 24-умин солгарди Истиқлолияти давлатии Ҷумҳурии Тоҷикистон баргузор шуд. Маҷлисро  президенти Академияи илмҳои Ҷумҳурии Тоҷикистон, академик Фарҳод Раҳимӣ оғоз намуда оид ба дастовардҳои сиёсӣ,  иҷтимоию иқтисодӣ, илмию фарҳангӣ дар замони 24 соли Истиқлолияти давлатии Ҷумҳурии Тоҷикистон сухан гуфт. Сипас академикҳо Талбак Назаров ва Кароматулло Олимов хотираҳои худро оид ба кори Комиссияи оштӣ ва роҳҳои пурмашаққати ба даст овардани истиқлолияту ваҳдати миллӣ зикр намуданд. Дар робита ба ҳаводиси охир Изҳороти кормандони Академияи илмҳо қабул карда шуд, ки он тавассути воситаҳои ахбори омма ба табъ мерасад.

    Дар охири маҷлис бахшида ба 24-умин солгарди Истиқлолияти давлатии Ҷумҳурии Тоҷикистон узви вобастаи АИ ҶТ, доктори илмҳои биология муовини директор оид ба корҳои илм ва таълими Институти ботаника, физиология ва генетикаи растании АИ ҶТ Ҳомидҷон Абдуллоев бо медали  “Нишони фахрӣ” ва 20 нафар кормандони Раёсати Академияи илмҳо  бо “Ифтихорномаи Академияи илмҳои Ҷумҳурии Тоҷикистон” сарфароз гардонида шуданд.