КОНФЕРЕНСИЯИ ЯКУМИ ТАШКИЛОТҲОИ ИБТИДОИИҲХДТ ДАР АИ ҶТ

     28 – уми январи соли 2016 дар толори Академияи илмҳои Ҷумҳурии Тоҷикистон Конференсияи якуми ташкилотҳои ибтидоии Ҳизби Халқии Демократии Тоҷикистон дар Академияи илмҳои Ҷумҳурии Тоҷикистон бо иштироки раиси ташкилоти ибтидоии ҳизбии “Илмпешагон”–и ҲХДТ дар АИ ҶТ, академик Фарҳод Раҳимӣ, муовини раиси Кумитаи иҷроияи ҲХДТ дар шаҳри Душанбе Одинаев Абдулазиз Абдукаримович ва раиси Кумитаи иҷроияи ҲХДТ дар ноҳияи Шоҳмансур Гадоиев Билол Иброгимович баргузор гардид.

     Конференсияи якуми ташкилотҳои ибтидоии Ҳизби Халқии Демократии Тоҷикистон дар Академияи илмҳои Ҷумҳурии Тоҷикистонро президенти АИ ҶТ, академик Фарҳод Раҳимӣ ҳусни оғоз бахшид.

     Академик Фарҳод Раҳимӣ дар бораи нуқтаҳои ососии Паёми Президенти Ҷумҳурии Тоҷикистон, Асосгузори сулҳу ваҳдати миллӣ–Пешвои миллат, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, ки рӯзи 20-уми январи соли равон баргузор гардид, ибрози андеша намуд. Ӯ аз ҷумла зикр кард, ки Асосгузори сулҳу ваҳдати миллӣ–Пешвои миллат дар Паёми навбатии худ равандҳои сиёсиву иҷтимоӣ, илму фарҳанг, сиёсати дохилию хориҷии кишварро дар соли сипаришуда мавриди баррасӣ қарор дода, бо бозгӯи камбудиву норасоӣ ва дастоварду комёбиҳо вазифаю нақшаҳои минбаъдаро дар соли 2016 мавриди назари аҳли ҷомеа қарор доданд.

     Президенти Ҷумҳурии Тоҷикистон, Асосгузори сулҳу ваҳдати миллӣ–Пешвои миллат, муҳтарам Эмомалӣ Раҳмон махсусан дар мавриди тарбияи дурусти ҷавонон дар руҳияи худшиносии миллӣ, пешгирии онҳо аз пайвастан ба гуруҳҳои даҳшатафкану тундгаро ва ҳифзи манфиатҳои миллӣ, ҳимояи дастовардҳои замони Истиқлолият, баланд бардоштани илму фарҳанги сиёсии ҷавонон, дастгирии соҳибкорони ҷумҳурӣ, ҷалби сармояи хориҷӣ, таъсиси ҷойҳои нави кор ва дигар масоили марбут ба амният ва рушду тараққиёти кишвар андешаҳои судмандро иброз намуданд.

     Мақсад аз Конференсияи якуми ташкилотҳои ибтидоии Ҳизби Халқии Демократии Тоҷикистон дар Академияи илмҳои Ҷумҳурии Тоҷикистон таъсис додан ва номгузорӣ кардани Кумитаи иҷроияи ибтидоии ҳизбӣ дар Академияи илмҳои Ҷумҳурии Тоҷикистон ва интихоби ҳайати аъзои Кумита мебошад.

     Конференсияи якуми ташкилотҳои ибтидоии Ҳизби Халқии Демократии Тоҷикистони Академияи илмҳои Ҷумҳурии Тоҷикистон бо тартиби муқарраргардида қарор қабул намуд, ки:

     1.Бо мақсади ба талаботҳои бандҳои 4, 4 Оинномаи ҲХДТ ҷавобгӯ будан, дар Академияи илмҳои Ҷумҳурии Тоҷикистон Кумитаи иҷроияи ибтидоии ҲХДТ таъсис дода шавад.

     2.Кумитаи иҷроияи ибтидоии ҲХДТ дар АИ ҶТ минбаъд “Хирадмандон” номгузорӣ карда шавад.

     3.Назорати фаъолияти ташкилотҳои ибтидоии ҳизбии назди АИ ҶТ минбаъд ба уҳдаи Кумитаи иҷроияи ибтидоии “Хирадмандон”–и ҲХДТ дар АИ ҶТ вогузор карда шавад.

     4.Назорати иҷрои Қарори мазкур ба зиммаи Раёсати Кумитаи иҷроияи ибтидоии “Хирадмандон”–и ҲХДТ дар АИ ҶТ вогузор карда шавад.

     Сипас тартиби муқарраргардида бо мақсади дуруст ба роҳ мондани фаъолияти коргузории ташкилотҳои ҲХДТ дар АИ ҶТ ҳайати аъзои Кумитаи иҷроияи ибтидоии “Хирадмандон”–и ҲХДТ дар АИ ҶТ иборат аз 15 нафар интихоб гардид.

     Дар Конференсия муовини раиси Кумитаи иҷроияи ҲХДТ дар шаҳри Душанбе Одинаев Абдулазиз Абдукаримович барои иштироки фаъолона дар кори Конференсия изҳори минатдорӣ карда, аз ҳамаи ҳозирин хоҳиш кард, ки дар амалӣ намудани қарорҳои Конференсия, барномаи ҲХДТ ва дастуру супоришҳои раиси ҳизбамон муҳтарам Эмомалӣ Раҳмон саҳми сазовор гузоранд. Фаъолони ҳизб бо Ифтихорнома ва Сипосномаҳои Кумитаи иҷроияи ҲХДТ дар ноҳияи Шоҳмансури шаҳри Душанбе сарфароз гардонида шуд. 

     Дар охири Конференсияи якуми ташкилотҳои Ҳизби Халқии Демократии Тоҷикистон дар Академияи илмҳои Ҷумҳурии Тоҷикистон раиси Кумитаи иҷроияи ибтидоии “Хирадмандон”–и ҲХДТ дар АИ ҶТ, академик Фарҳод Раҳимӣ ва муовини раис Ширин Қурбонова интихоб гардиданд.