joomla
free templates joomla

#МИЗИ МУДАВВАР. ҲАМКОРИҲОИ ИЛМӢ ВУСЪАТ МЕЁБАНД!

  Эҳтимол ин сурати 10 нафар аст.
  Дар доираи баргузории рӯзҳои фарҳангии Ҷумҳурии Туркманистон дар шаҳри Душанбе имрӯз (04.04.2024)дар толори Маркази мероси хаттии назди Раёсати Академияи миллии илмҳои Тоҷикистон мизи мудаввар бо иштироки президентҳои Академияи илмҳои Ҷумҳурии Тоҷикистон ва Ҷумҳурии Туркманистон, олимону зиёиёни илмӣ ва эҷодии ҳарду кишвари бо ҳам дӯст дар мавзӯи «Махтумқулӣ Фирагӣ - тарбиягари идеяи бародарии халқҳо» баргузор гардид.
   Нахуст Президенти Академияи миллии илмҳои Тоҷикистон Хушвахтзода Қобилҷон Хушвахт Президенти Академияи илмҳои Туркманистон Аширов Аллаберди Аширович ва ҳамроҳони ӯро ташрифашонро хайру мақдам гуфта, изҳор дошт, ки ҳамкориҳоро дар самти илми ду кишвари дӯсту бародар густариш дода, барои ба даст овардани натиҷаҳои илмии назаррас талош хоҳем кард. Зимнан Президенти Академияи илмҳои Туркманистон Аширов Аллаберди Аширович низ дар баромадашон суханони Хушвахтзода Қ.Х. ҷонибдорӣ намуда, баён дошт, ки ҳамкориҳои илмиро ҷоннок хоҳем кард.
Зимни баргузории мизи мудаввар Суфизода Шодимуҳаммад – директори китобхонаи марказии илмии ба номи И. Ганди, Давлатзода Раҳматкарим Мирзокаримович – директори Маркази мероси хаттии назди Раёсати АМИТ, Оразсахдов Давут – директори Институти забон, адабиёт ва дастхатҳои миллии ба номи Махдумкули АИТ, Файзулло Баротзода – Раиси комиссияи МНМОҶТоид ба одоби парлумонӣ, Хангельдиев Гулялек – Ходими калони илмии Институти забон, адабиёт ва дастхатҳои миллии ба номи Махдумкули АИТ, Аскаралӣ Раҷабов – Мудири шуъбаи санъати Институти таърих бостоншиносӣ ва мардумшиносии ба номи А. Дониши АМИТ, Хоммиева Маягозель – Ходими калони илмии Институти забон, адабиёт ва дастхатҳои миллии ба номи Махдумкули АИТ, Саидов Абдуқаҳҳор – Ходими пешбари илмии Институти таърих бостоншиносӣ ва мардумшиносии ба номи А. Дониши АМИТ, Ширнепесов Аманнепес Гоюнчыевич – Мудири кафедраи адабиёти туркмени ДДТ ба номи Махтумкули, номзади илмҳои филологӣ, Назар Муъмин Абдуҷалол – котиби илмии Институти фалсафа, сиёсатшиносӣ ва ҳуқуқи ба номи А. Баҳоваддинови АМИТ ишитрок ва суханронӣ намуда доир ба моҳияти ин ҳамоиш фикру ақидаҳои худро баён намуданд.
   Бояд гуфт, ки мақсад аз баргузории мизи мудаввар ба муносибати 300- солагии шоир ва муттафакири Шарқу туркман Махтумқулӣ Фарохӣ ба нақша гирифта шуда, дар заминаи ин олимон ва зиёиёни илмӣ ва эҷодии Туркманистон ва Ҷумҳурии Тоҷикистон ҳамкориҳои судманди илмии худро равнақу густариш медиҳанд.
Ёдовар мешавем, ки Ҷумҳурии Тоҷикистон тайи солҳои соҳибистиқлолӣ бо азму талоши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Ҷумҳурии Туркманистон бо ҳам шарики стратегӣ буда, маҳз дар заминаи ин ҳамкориҳои густурда дар соҳаҳои гуногун барқарор намудаанд. Маҳз дӯстиву бародарии роҳбарони ин ду кишвар аст, ки равобитҳои давомдор ва ҳамкориҳои мутақобилан судманд дар низоми давлатдории ин ду кишвар мустаҳкаму устувор гардидаанд.
Ҳамкории муассисаҳои илмии Ҷумҳурии Тоҷикистон бо Туркманистон дар низоми мутақобилан судманд ба роҳ монда шуда, то ин ҷониб чандин созишномаву санадҳои лозима ба тавсиб расонида шудаанд. Дар оянда қарор аст, ки ҳамкории муассисаҳои илмии Тоҷикистон ва Туркманистон дар низоми сифтан нав ба роҳ монда шаванд.

ҲАФТАИ ИЛМ ДАР АМИТ

  Возможно, это изображение 1 человек и отдел новостей
  Дар сиёсати иҷтимоии Ҳукумати Ҷумҳурии Тоҷикистон соҳаи илм бо ташаббус ва сиёсати хирадмандона ва илмпарваронаи бевоситаи Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон самти афзалиятнок эълон гардидааст. Пурмаҳсул гардонидан ва тақвият бахшидани фаъолияти маркази асосии илми тоҷик – Академияи илмҳои Ҷумҳурии Тоҷикистон низ аз ин сиёсат сарчашма гирифта, илм дар баробари маорифу фарҳанг аз самтҳои афзалиятноку стратегии рушди миллӣ эътироф гардидаст.
Давлат ва ҳукумат илмро ҳамчун омили пешбарандаи ҷамъият арзёбӣ намуда, барои рушди минбаъдаи он ва беҳтар кардани шароити иҷтимоиву иқтисодии олимон тадбирҳои судманд меандешад.
   Ҳамасола моҳи апрел дар тамоми муассисаву марказҳои илмии ҷумҳурӣ ҳафтаи илм бо шаҳомати хоса баргузор мегардад. Ба ин муносибат имрӯз (05.04.2024) дар Акдемияи миллии илмҳои Тоҷикистон бахшида ба “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф солҳои 2020-2040”, “Даҳсолаи байналмилалии «Об барои рушди устувор, солҳои 2018-2028”, эълон гардидани соли 2024 ҳамчун “Соли маърифати ҳуқуқӣ” конференсияи илмӣ-назариявӣ баргузор гардид.
Ба кори конфронс Президенти Академияи миллии илмҳои Тоҷикистон Хушвахтзода Қобилҷон Хушвахт ҳусни оғоз бахшида бо сухани муқадимавии хеш, ба олимону корамндони академия оғози ҳафтаи илмро хайру мақдамгуфта, ба онҳо дар ҷодаи илм барору комёбӣ ва барои ба даст овардани натиҷаҳои назаррасро дар ин самт таъкид намуд. Гуфта шуд, ки «Ҳафтаи илм» фурсати хубе барои табодули андешаву дастовардҳои илмии ҳайати олимони Академия ва таҳрикбахше дар ростои машғул шудан ба пажӯҳишҳои илмист. Ба хотири боз ҳам беҳтар ба роҳ мондани омӯзиши илмҳои табиатшиносӣ, дақиқ ва риёзӣ инчунин, барои тавсеяи тафаккури техникии насли наврас солҳои 2020 - 2040 аз ҷониби Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон карда шудааст. Ин иқдом ба рушди тафаккури техникӣ ва тавсеяи ҷаҳонбинии илмии ҷомеа такони ҷиддӣ мебахшад.
Дар идомаи конфронс ноибони Президенти Академияи миллии илмҳои Тоҷикистон Саидов Абдусатор, Қоҳирова Гулчеҳра, Муҳаммад Абдураҳмон, Ғоибзода Алиҷон Ҷура доир ба мавзуҳои “Хатрҳои глобалӣ ба гуногунии биологӣ ва экосистемаҳо”, “Терроризм ва хавфҳои репутатсионӣ ҳамчун усули технологияҳои сиёсӣ” ва “Усулҳои муосири ташхис ва табобати фишорбаландии дуюмдараҷа” маъруза намуданд.
Дар интиҳо Президенти Академияи миллии илмҳои Тоҷикистон Хушвахтзода Қобилҷон Хушвахт ба кори конфронс хотима бахшида зикр дошт, ки иқдоми наҷиб, яъне, соли 2024 – ҳамчун «Соли маърифати ҳуқуқӣ» эълон гардидан ба дурнамои неки таҳкими низоми демократӣ, ҷомеаи адолатпарвару ҳуқуқмеҳвар ва қонунсолор мусоидат менамояд. Шуурнокии ҳуқуқии шаҳрвандон аз бисёр ҷиҳат муайянкунандаи дараҷаи рушди давлат ва таъмингари эътибори он дар миқёси ҷаҳони муосир аст. Месазад, ки дар партави иқдомҳои дурандешонаи Президенти Ҷумҳурии Тоҷикистон муҳтарам Эмомалӣ Раҳмон шаҳрвандон дар доираи эълони соли 2024 – ҳамчун «Соли маърифати ҳуқуқӣ» баҳри боло бурдани сатҳи маърифати ҳуқуқии шаҳрвандон даст ба кор бошанд ва сифати баланди баргузории чорабиниҳои нақшавиро дар ин самт татбиқ намоянд.
Дар ибтидо, Конфренсияи ҷумҳуриявии илмию амалии ҳайати олимони АМИТ бахшида ба “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф (солҳои 2020-2040)”, “Даҳсолаи байналмилалии «Об барои рушди устувор, 2018-2028”, “Соли маърифати ҳуқуқӣ” кушода эълон гардид.

Терроризм – ифротгароӣ. Хатаре, ки башарро таҳдид мекунад

 

 

 

   Возможно, это изображение 1 человек и текст «терроризм»
   “Дар хотир дошта бошем, ки роҳбарони гурӯҳҳои террористиву экстремистӣ, ки фарзандони мову шуморо ба сафҳои худ ҷалб менамоянд, азоби таваллуд кардану ба воя расонидани фарзандони моро накашидаанд, заҳмати бедорхобиро надидаанд ва ба онҳо нону об надодаанд. Аз ҳамин хотир фарзандони мову шумо барои онҳо ҳеҷ арзиш надоранд, дар як лаҳза онҳоро ба террористи худкуш табдил дода, ҳадафҳои нопоки худро амалӣ месозанд. Баъди аз даст додани онҳо танҳо ҷони падару модар месӯзаду халос. Мо набояд гузорем, ки номи фарзандони мо дар таърихи миллат ҳамчун террорист ё ифротгаро сабт шавад. Ин дар шаъни падару модари тоҷик ва миллати соҳибфарҳангу бостонии тоҷик айб аст”.
Эмомалӣ Раҳмон
   Ин чанд ҷумла аз охирин суханронии Пешвои муаззами миллат иқтибос шуд. Як бахши муҳими суханронии муҳтарам Эмомалӣ Раҳмон дар мулоқот бо фаъолон, намояндагони ҷомеа ва ходимони дини мамлакат, ки рӯзи 9 марти соли 2024 баргузор шуд, ба ҳамин мавзуъ, яъне терроризм ва экстремизм бахшида шуд. Сарвари Давлати Тоҷикистон бо эҳсоси баланди масъулият дар назди миллат ва халқҳои кишвар пайваста моро аз ҷалби ҷавонон ба созмонҳои террористӣ ва паёмадҳои он ҳушдор медиҳанд. Ва ин бесабаб ҳам нест.
   Терроризму ифротгароӣ зуҳуроти харобиоваранд, ки имрӯз ҷомеаи ҷаҳониро ба ташвиш овардаанд. Ин ду мафҳум, ки куштор кинаву адоват ва ғаразу ҳангомабарандозиро дар маҷмӯъ дар бар мегиранд, боиси садҳо низоъҳо ва амалҳои вайронгар дар саросари олам шудаанд. Инсоният бахусус аввали асри XXI ба ин хатари мудҳиш бештар рӯбарӯ шуд. Терроризми имрӯза аз гузашта бо чандин хусусиятҳои фарқ мекунад ва ба симову сурат тахрибкортарин ва вайронгартарин амал ба ҳисоб меравад.
Гурӯҳои террористӣ аз ҷониби хадамоти махсуси давлатҳои алоҳида дастгирӣ ёфта, бо роҳу василаҳои мухталиф тавассути тарғиби ғояҳои зиддимиллӣ ва ифротгароёна даст ба ҳамалоти маргбор мезананд ва ҳаёти ҳазорон нафарро зери хатар мегузоранд. Силоҳи таблиғотии имрӯза барои гурӯҳҳову дастаҳои ифротгаро ва экстремист шабакаи ҷаҳонии Интернет аст ва бо истифода аз фазои бекарону то ҷойе бесоҳиб ҷавонони ноогоҳу камдонишро даъват мекунанд. Аксари кулли онҳое, ки ба узвияти ин созмонҳо шомил мешавнд, шахсони беҳуввият ва аз бедонишӣ зери бори таблиғоти дурӯғин рафта мебошанд. Касонеанд, ки аз асли Ислом бехабаранд. Исломе, ки куллан зидди харобкориву куштору ғасб аст.
Дар заминаи фаъолияти созмонҳои террористӣ солҳои охир ҷангҳои иттилоотӣ низ дар арсаи ҷаҳонӣ бештар шуда, ҷудоиандозӣ ва бегонапарастӣ дар баъзе давлатҳо зиёд ба чашм мерасад.
Ҳамзамон гурӯҳҳое, ки қаблан наметавонистанд ба ҳадафҳои муғризонаи худ бирасанд, имрӯз бо дастгирии қудратҳои хориҷӣ берун аз давлатҳои худ ба фаъолиятҳои тағрибӣ шурӯъ намуда, талош мекунанд суботу амниятро барҳам зананд.
Новобаста аз он, ки имрӯз пайвастани ҷавонон ба чунин гурўҳои ифротгаро ва мутаассиб дар кишвари мо кам гардида бошад ҳам, вале таҳдиди таъсири чунин ташкилотҳои ифротгарро ба суботу оромӣ зиёд аст. Кам шудани пайвастани ҷавонон ба ин гурӯҳҳои ифротӣ натиҷаи кори машаққатбори хадамоти амниятӣ, мақомоти ҳифзи ҳуқуқ ва роҳандозии корҳои таблиғотӣ дар ҷомеаи Тоҷикистон буд.
Бояд гуфт, ки ташкилотҳои террористӣ асосан гурӯҳҳои идорашаванда буда, аз ҷониби нафарони алоҳида назорат ва сарпарастӣ мешаванд. Ин созмонҳо, ки аз берун идора мешаванд, танҳо як ҳадаф доранд: бесубот кардани ҷомеа, барҳам задани амнияту бехатарӣ ва бо истифода аз ин даст задан ба амалҳои бадкирдорона аст.
Тайи солҳои охир раванди ҷалби ҷавонон ба ташкилотҳои террористӣ тавассути шабакаҳои иҷтимоӣ хислатҳои нав касб кардааст. Террористон дигар ба воситаи зулму шиканҷа на, балки бо роҳи дасиса паҳн намудани хабарҳои беасосу дурўғин ҷавононе, ки дониши комил ва огоҳии сиёсӣ надоранд, аъзои ташкилотҳои хеш мегардонанду бо дасти онҳо ҳадафҳояшонро амалӣ месозанд.
Дар чунин вазъ тарбияи дурусти ҷавонону наврасон, ки ояндаи миллату давлат мебошанд, муҳиму саривақтӣ аст. Ба воситаи бедор кадани ифтихори миллӣ ва эҳсоси худшиносию худогоҳӣ дар замири онҳо ҳадафҳои олии давлату ҳукумат амалӣ шуда, оянда ҷомеа дурахшону мунавар мегардад.
Як василаи дигаре, ки ташкилоту созмонҳои террористиву ифротгаро аз он истифода мебаранд, ин расидан ба эҳсоси маҳаллии ҷавонон аст. Яъне тақвияти маҳалгароӣ. Тибқи ҳамон мақоли маъмулии “Тафриқа андозу ҳокимият кун”. Марази маҳалгароӣ дар мо мутаассифона, вуҷуд дорад ва баркандани ин маризӣ яке аз василаҳоест, ки мо метавонем ҷавононро аз шомил шудан ба сафи гурӯҳҳои ифротгаро боздорем.
Маъмулан ин гурӯҳу ин дастаҳо ифротгароянд, таассубӣ ва хурофотпарастанд. Инҳо аз Ислом он чизеро таблиғ мекунанд, ки ба фоидаи худашон бошад. Дини Ислом дини ахлоқ аст, дини покист, дини инсонсоз аст. Вале гурӯҳҳо бо шарҳи нодурусти оятҳои он ҷавонони ноогоҳро мағзшӯӣ мекунанд ва онҳоро ба ифроткароиву тааассуб моил месозанд. Ин гуна мисолҳо зиёданд. Чӣ дар гузашта ва чӣ имрӯз як василаи ҷалби афрод маҳз ҳамин таассуб ва ифрот аст.
Як сабаби дигаре, ки ҷавонон моил ба чунин гурӯҳҳо мешаванд, надонистани қонунҳои кишвар аст. Қонунҳои Тоҷикистон ширкати шаҳрвандони кишварро дар ҷангҳо берун аз хоки Тоҷикистон ва пайвастани онҳоро ба созмонҳои террористиву экстремистӣ, гурӯҳу дастаҳои ифротӣ на танҳо манъ мекунанд, балки ҷиноят медонанд. Танҳо кофист ба ёд орем, ки Ҷумҳурии Тоҷикистон мубориза зидди терроризм ва экстремизмро бо қабули ин қонунҳо тақвият бахшидааст: «Дар бораи озодии виҷдон ва иттиҳодияҳои динӣ», «Дар бораи муқовимат ба экстремизм», «Дар бораи муқовимат ба терроризм», «Дар бораи танзими анъана ва ҷашну маросим», «Дар бораи масъулияти падару модар дар таълиму тарбияи фарзанд», Консепсияи сиёсати давлатӣ дар соҳаи дин, стратегияҳои миллӣ оид ба муқовимат ба экстремизм ва терроризм барои солҳои 2016 – 2020 ва 2021 – 2025 қабул ва мавриди амал қарор дода шудаанд.
Бояд ба ҷавонон маҳз инро фаҳмонд. Соли маърифати ҳуқуқи эълон шудани соли 2024 ба ҳамин ҳадаф аст. Яъне, агар мо қонунро донем, ба ҷойе пой намегузорем, ки манъ аст. Пешвои азизи миллат дониста соли маърифати ҳуқуқӣ эълон карданд. Миллат бояд қонундон бошад, то фиреб нахӯрад.
Зиракии сиёсиро дар замири аҳли ҷомеа хусусан наврасону ҷавонон тақвият бахшидан яке аз вазифаҳои асосии оила, муассисаҳои таълимӣ ва аҳли ҷомеа мебошад. Дар ҳолати баланд бардоштани сатҳи огоҳии миллӣ ҷавонону наврасон дар шароити зудтағйирёбандаи ҷаҳони муосир ва замони бархӯрди хатари терроризму ифротгароӣ кам гардида, моҳияти истиқлолияту озодӣ ва сулҳу субот комил мешавад.
Тоҷикистон дар масири муқовимат бо терроризму экстремизм дар минтақа ва ҷаҳон мавқеъи устувор дошта, ҳамеша ин зуҳуроти номатлубро маҳкум мекунад. Ҳамин аст, ки дар мамлакати мо чандин конфронсу ҳамоишҳои сатҳи баланд вобаста ба муқовимат бо терроризм ва ифротгароӣ бо иштироки доираи васеи коршиносони ҷаҳонӣ, сиёсатмадорону таҳлилгарон баргузор шудааст.
Тарғиби ғояҳои тунд ва харобиовар тавасути шабакаҳои иҷтимоӣ рушд кардааст, аъзоёни ташкилотҳои террористиву экстремистӣ мехоҳанд бо пешниҳоди хабарҳои беасосу дуруғин ва ҳангомаҳои муғризонаашон шууруи миллӣ, ҳамзамон худшиносӣ ва худогоҳии миллии ҷавононро коста намоянд. Ба ҳамин хотир зарур аст, ки ҳадафу мақсадҳои нопоки чунин афроди вайронкору хиёнатпешаро возеҳтар дарк намоем ва бар муқобили онҳо, ки нооромии аҳли сайёрраро мехоҳанд, шадидан мубориза мебарем.
Имрӯз хусусияти глобалӣ доштани таҳдиди терроризмро эҳсос намуда,ҷомеаи ҷаҳонӣ бо ҳамаи гуна роҳу усулҳои мавҷуд буда бо ин падидаи номатлуб мубориза бурда истодааст. Бо мақсади коркарди механизми мубориза бо ин зуҳуроти манфӣ созмонҳо ва иттиҳодияҳои имконпазир ташкил карда мешавад. Зеро пешгирӣ намудани амалҳои террористӣ бештар ба ташвиқу тарғиби идеологияи миллӣ ва ташаккули амнияти идеологӣ вобастагӣ дорад,ки бояд аз ҷониби сарварони сиёсӣ, шаҳрвандон ва кишварҳо дастгирӣ ёбанд.
Мавриди қайд аст, ки идеологияи миллӣ дар замони соҳибистиқлолии Тоҷикистони азиз барои бедор намудан ва ташкил кардани иродаи дасттаҷамъонаи мардум аҳамияти умумимиллӣ дорад. Хамзамон, омӯзишу таҳқиқи идеологияи миллӣ дар муқобили терроризм барои муайян намудани манфиятҳои аслӣ ва пешгирӣ намудани идеологияи экстремистӣ зарурияти воқеӣ дорад ва он дар раванди таҳқими давлатдории миллӣ фурсати муносиб мебошад.
Аминзода П., Каримов Р. Ш ИНСТИТУТИ ГЕОЛОГИЯ, СОХТМОНИ БА ЗАМИНҶУНБӢ ТОБОВАР ВА СЕЙСМОЛОГИЯИ АМИТ

 

 

 

СЕМИНАР – МАШВАРАТИ ОЗМУНИ ҶУМҲУРИЯВИИ “ИЛМ – ФУРӮҒИ МАЪРИФАТ”

  Эҳтимол ин сурати 3 нафар, ҳуҷраи ахбор ва матне, ки "UNIVERSITY MICIAN OSIMI €19560 донишгохи техникии точикистон номи академик осими бехтарин донишгох барои ояндаи бехтарин! tu.tj таджикский технический университет академика осими лучший университет для лучшего будущего! www.ttu.tj 1956 HNICAL UNIVERSITY OSIMI бехтарин www.ttu.tj you ояндаи бехтарин! донишгохи техникии точикистон кадемик 作自翻目宿) M.COC лучший университет для лучшего таджикский технический университет мика M.C. осими +u.tj 1956 донишгох гехники академ 1956 таджикский техничес BOSCH ®BOSCH" мегӯяд аст.
  02 апрели соли ҷорӣ бо мақсади иҷрои Амри Президенти Ҷумҳурии Тоҷикистон аз 1 январи соли 2024 АП №-481 ва амалисозии “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” дар бораи дар сатҳи баланд баргузор намудани озмуни ҷумҳуриявии “Илм-фурӯғи маърифат” дар толори Донишгоҳи техникии Тоҷикистон ба номи академик М.С.Осимӣ сенминар - машварати озмуни ҷумҳуриявии “Илм-фурӯғи маърифат”баргузор гардид.
Дар кори ин семинар – машварат ректори Донишгоҳи техникии Тоҷикистон ба номи академик М.С.Осимӣ Давлатзода Қудрат Қамбар., ноиби Президенти Академияи миллии илмҳои Тоҷикистон Қоҳирова Гулчеҳра Исроиловна., котиби ҳамоҳангсози озмуни ҷумҳуриявии “Илм-фурӯғи маърифат” шахсони мутасаддии озмуни ҷумҳуриявии "Илм - фурӯғи маърифат" аз шаҳру ноҳияҳои тобеи ҷумҳурӣ (шаҳрҳои Турсунзода, Ҳисор, Ваҳдат, Роғун, ноҳияҳои Рӯдакӣ, Шаҳринав, Варзоб, Файзобод) иштирок ва суханронӣ намуданд.
   Ёдовар мешавем, ки озмуни мазкур аз ҷониби Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон ба хотири амалисозии “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” роҳандозӣ гардидааст. Бояд гуфт, ки масъулони асосӣ барои баргузор намудани озмуни ҷумҳуриявии “Илм-фурӯғи маърифат”Академияи миллии илмҳои Тоҷикистон, Вазорати маориф ва илми Ҷумҳурии Тоҷикистон, Вазорати саноат ва технологияҳои нав, Вазорати рушди иқтисод ва савдо, Вазорати кишоварзӣ Саридораи геология мебошанд. Ҳамзамон Кумитаи телевизион ва радиои назди Ҳукумати Ҷумҳурии Тоҷикистон, Кумитаи кор бо ҷавонон ва варзиш, Кумитаи кор бо занон ва оилаи назди Ҳукумати Ҷумҳурии Тоҷикистон, Агентии милли иттилоотии Тоҷикистон «Ховар» ва нашрияҳои давлатӣ вазифадоранд, ки саҳми худро дар тарғибу ташвиқи ҷараёни баргузории озмун гузоранд.
  Мақсад аз баргузории озмуни ҷумҳуриявии “Илм-фурӯғи маърифат” ин амалисозии “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” буда, дар ин замина рушди тафаккури техникӣ, тарғиби ҷаҳонбинии илмӣ, дастрасӣ пайдо кардан ба техникаву технология, тавсеаи ихтироъкорон ва навоварӣ, пайвасти илм ба истеҳсолот, ҷалби бештари хонандагону донишҷӯён ва дигар қишрҳои ҷомеа ба омӯзиши фанҳои табиатшиносӣ, дақиқ ва риёзӣ, ҳамчунин барои дарёфт ва муаррифии истеъдодҳои нав дар ин самтҳо мусоидат менамояд.

КОНФЕРЕНСИЯИ БАЙНАЛМИЛАЛИИ ИЛМӢ-АМАЛӢ ДАР МАВЗУИ «АҲАМИЯТИ БАЙНАЛМИЛӢ ВА ТАЪРИХИИ ИБТИКОРИ ҶУМҲУРИИ ТОҶИКИСТОНДАР СОҲАИ ОБ ВА ЭЪЛОН НАМУДАНИ СОЛИ 2025- СОЛИ БАЙНАЛМИЛАЛИИ ҲИФЗИ ПИРЯХҲО»

    Дар толори маҷлисгоҳи Донишгоҳи Славянии Русияву Тоҷикистон Конференсияи байналмилалии илмӣ-амалӣ дар мавзуи «Аҳамияти байналмилӣ ва таърихии ибтикори Ҷумҳурии Тоҷикистон дар соҳаи об ва эълон намудани “Соли 2025 - Соли байналмилалии ҳифзи пиряхҳо”» баргузор гардида, дар он сиёсатмадорон, олимон, муҳаққиқони дохилу хориҷи кишвар, намояндагони корпусҳои дипломатии Осиёи Марказӣ ва Федератсияи Русия иштирок доштанд, аз он ҷумла Маркази омӯзиши пиряхҳои Академияи миллии илмҳои Тоҷикистон, Вазорати энергетика ва захираҳои оби Ҷумҳурии Тоҷикистон, Вазорати корҳои хориҷии Ҷумҳурии Тоҷикистон, Донишгоҳи милии Тоҷикистон, Донишгоҳи давлатии Томски Русия, Институти Сибир ва Шимоли Донишгоҳи юридикии федералии Сибир, Дастгоҳи Сенати Парлумони Ҷумҳурии Қазоқистон, Институти таҳқиқоти стратегии назди Донишгоҳи Славянии Кирғизистон ва Русия.
   Дар конференсияи мазкур директори “Маркази омӯзиши пиряхҳои Академияи миллии илмҳои Тоҷикистон” профессор Абдулҳамид Қаюмов иштирок намуда, маърузаи худро дар мавзуи “Ҷумҳурии Тоҷикистон – пешоҳанг дар самти омӯзиш ва ҳифзи пиряхҳо” пешкаши ҳозирин намуда, қайд намуд, ки таҳлили адабиёти илмӣ оид ба ҳолати омӯзиши пиряхҳои ҳудуди Ҷумҳурии Тоҷикистон гувоҳӣ медиҳад, ки баъди солҳои 90-ум таҳқиқоти илмӣ-бунёдӣ дар ҳудуди Ҷумҳурии Тоҷикистон умуман гузаронида нашудааст ва шароити гузаронидани он низ комилан вуҷуд надошт. Чунин маълумот дар мақолаҳои олимони маъруф, аз қабили В. Котляков ва А. Финаев низ дарҷи худро ёфта буданд.
    Асосгузори сулҳу ваҳдати миллӣ - Пешвои муаззами миллат, Президенти кишвар муҳтарам Эмомалӣ Раҳмон ҳолати воқеӣ оид ба омӯзиши пиряхҳоро ба назар гирифта, дар асоси сиёсати созандаю бунёдкоронаи худ ва ҳамзамон таҳлили амиқи ҳаматарафа супориш дода буданд, ки дар Академияи миллии илмҳои Тоҷикистон махсус як Муассисаи давлатии илмии ”Маркази омӯзиши пиряхҳо” ташкил карда шавад, ки он бояд таҳқиқоти бунёдиро бо усулҳои муосири инноватсионӣ гузаронад. Вазифаи аввалиндараҷаи Марказ ин муайян намудани шумора, ҳаҷм ва ҳолати пиряҳо дар равиши тағйирёбии иқлим дар асосӣ тадқиқотҳои бунёдӣ буд.
Пойгоҳи пиряхи Федченко имрӯз фаъолият намекунад, лекин хушбахтона, маркази мазкур айни замон 6 пойгоҳи баландкӯҳро дар баландиҳои аз 3800 – то 4899 метр ҷойгир намудааст, ки тавассути онҳо пиряхҳоро таҳти назорати доимӣ қарор додааст.
   Доир ба масъалаи қабул гардидани қатънома оид ба эълон намудани соли 2025 ҳамчун “Соли байналмилалии ҳифзи пиряхҳо” МДИ “Маркази омӯзиши пиряхҳои Академияи миллии илмҳои Тоҷикистон” масъулиятро дар самти омӯзиш ва ҳифзи пиряхҳо боз ҳам ҷоннок карда, ҳамзамон ба таври пайваста бо иштироки олимону мутахассисони соҳавӣ Стратегияи гузаронидани чорабиниҳои илмӣ- амалӣ оид ба соли 2025 “Соли байналмилалии ҳифзи пиряхҳо” ва Барномаи гузаронидани корҳои илмӣ- тадқиқотӣ ва экспедитсионӣ ҷиҳати ташкил ва гузаронидани соли 2025 ҳамчун “Соли байналмилалии ҳифзи пиряхҳо”-ро таҳия намуда, ба Ҳукумати Ҷумҳурии Тоҷикистон барои барраси пешниҳод намудааст, ки ин дар сиёсати имрузаи Ҷумҳурии Тоҷикистон дастоварди назаррасест.
Дар доираи маърузаи худ профессор Абдулҳамид Қаюмов тадқиқотҳои илмии “Маркази омӯзиши пиряхҳои Академияи миллии илмҳои Тоҷикистон”-ро, ки ба омӯзиш ва ҳифзи пиряхҳо равона карда шудаанд қайд намуд ва изҳор дошт, ки Марказ Феҳристи пиряхҳои системаи Федченкоро бо дастгирии Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон бо истифода аз технологияи муосири харитасозӣ чоп намудааст. Дар фарҷоми баромади худ оид ба ҳамкориҳои Русия ва Тоҷикистон дар бахши омӯзиш ва ҳифзи пиряхҳо пешниҳодҳои мушаххас намуд.
Қобили зикр аст, ки конференсияи мазкур барои иштирокчиёни он ҳамчун минбари байналмилалии илмӣ-амалӣ барои ба роҳ мондани ҳамкорӣ ва табодулиёти таҷриба ва усулҳои омӯзиши криосфера ва илми пиряхшиносӣ хидмат намуд.